Y Mynyddoedd Glas, Sydney eto, a dyna ni, Awstralia wedi beni

Ein stop olaf cyn dychwelyd i Sydney oedd y Mynyddoedd Glas (MG). Nid mynyddoedd ydynt fel mae’r enw yn ei awgrymu, ond llwyfandir (plateau) gyda ceunentydd (gorges) clogyrnaidd wedi ei herydu hyd at 760 medr o ddyfnder. Maent yn rhan o World Heritage Site gyda pharciau cenedlaethol a gwarchodfa chadwraeth yn cwmpasi anialdir naturiol hynod o hardd. Er gwybodaeth, cafwyd y MG eu henwi yn Carmarthen Hills yn gyntaf gan bachan o’r enw Arthur Phillips yn 1788 ond fe’i newidiwyd yn anffodus … gan ryw Sais ynta. Mae’r enw y MG yn dod o’r wawr las sydd i’w weld o bell dros yr ardal a chaiff ei greu o’r olew sy’n cael ei ryddhau gan y coed ewcalyptws.

Cymerodd hi drwy’r dydd i ni gyrraedd tref Katoomba yng nghanol y MG (hefan o Alice Springs i Sydney ac yna ar drên o Sydney) ac unwaith i ni gyrraedd gwnaethom ymholiadau yn syth ar ble allwn wylio gêm Cymru yn erbyn yr Alban. Cawsom ddim lwc yn anffodus er i ni grwydro ar hyd y dref wedi canol nos yn holi mewn gwahanol dafarnau. Rhaid oedd i mi setlo ar chwilio allan ar fore Sul oddi wrth Wyddel oedd yn gweithio yn dderbynfa’r hostel bod Cymru wedi cario’r dydd unwaith eto (dau allan o ddau – a feuddwn ni ddechrau breuddwydio am y Gamp Lawn eto?????).

Tra yng Nghatoomba trampo oedd ein bwriad a darganfod ychydig o’r ardal hyfryd yma. Fe gerddom filltiroedd ar hyd y clogwyn ar dop y llwyfandir, milltiroedd pellach i lawr ar waelod y ceunant a rhwng y ddau cawsom fynd ar y ‘cable car’ (gyda llawr clir iddo i weld syth o’n tano), i lawr ar y ‘skyway’ (math arall o ‘cable car’) ac yna nôl lan ar y ‘funicular railway’. Gwelsom olygfeydd bendigedig gan gynnwys y Three Sisters; buom yn cerdded mewn rhagor o ‘Aussie bush’ a gweld lyrebird rhwng y tyfiant trwchus; dysgom ychydig am yr hen ddiwydiant glo fu’n llewyrchu yno heb anghofio mwynhau picnic neu ddau.

Gyda’n amser yn Awstralia yn gyflym yn dod i ben, roedd un diwrnod ar ôl gennym yn Sydney … i dynnu’r holl luniau na chawsom y tro cyntaf gan i’r camera benderfynnu fynd ar streic. Yn ffodus ni wnaeth yr un digwyddiad ailadrodd ei hun a chawsom luniau da i brofi ein bod wedi ymweld a’r ddinas a’r ty opera a phont yr harbwr ac ati. Cawsom socad dda gan gawod o law am ein hymdrechion – un funud roedd hi’n braf reit ac yna o’r pellter gwelsom y storm yn dod amdanom cyn ei harllwys hi i lawr. Ar ôl cysgodi am sbelen wrth ymyl Mrs Macquarie’s Chair rhoddom y gorau i aros iddi hindda ac unwaith i ni cael gwlychad dda fe arbedodd y glaw ac roedd hi’n braf eto mewn chwinciad. A dyna oedd ddiwedd ail ran o’n taith rownd y byd wedi mwynhau bob munud. Seland Newydd sy’n ein disgwyl ac Wncwl Alun a Anti Ceri oedd ein stop cyntaf yng Nghristchurch.